大海撈針

從來無想過要好心有好報，但願生活過得簡單開心。
沒想過，好心會換來痛苦和煩惱，
身心荷包都被吸乾…
但願我是一個「鐵石心腸」
旁人不會明白，
找一個可幫得上忙的人，如大海撈針!

第一次包餃子！

第一次包餃子！算係咁~~

今日奶茶爸「興起」，不如包餃子囉!
於是，兩個人急急腳到街市買材料，豬肉、椰菜「斤斤聲咁」買。
嘩，原來包餃子，要那麼多材料。

今次是頭一次包餃子，感覺好好玩！
奶茶爸讚我，第一次包算好靚！
呵呵呵～～～
自己包的好像特別好味！

窩心的小雞脾

真的沒想過雞脾仔來了我地家後，發生了大件事。
唉…才來了我們家幾日，在1月4日，早上，我發現雞脾沒精打采，不玩又不斷肚瀉，怕牠是腸炎…
於是和奶茶爸帶牠去看醫生，點知一驗…原來無腸炎，但有嚴重的病……我將奶茶爸在FB的留言放這裡：

1月4日

世事真係整定。
 雞脾來我家幾日，食得玩得，係成日肚瀉。初時以為轉狗糧唔適應，今日突然冇心機，就知出事。驚佢腸炎，匆匆睇醫生，點知腸炎就冇，反而驗到佢超貧血。懷疑是牛蜱熱，但又冇發燒喎！陣間要飛出西營盤睇專科，要留院輸血。唉，仲要排到8點半先有得睇，心急死人。希望雞脾大步欖過，睇佢個款都似係來搵我還債，唔好咁易放過我呀，咪走住呀。


1月6日

雞脾病情update
雞脾有狗瘟、牛蜱熱，紅血球是零……要馬上輸血…
基本上輸完血後已經生猛晒，昨天紅血球水平回復正常，但今天又降低了幾點，如果沒有進一步急降，可望明早出院。但就算出院還是要等待無數個化驗報告，牛蜱熱、腸炎、狗瘟等等，全部都高死亡率，雞脾仲有可能中大三元，三樣有齊添。不過冇所謂啦，食藥應該會醫得好既，睇個勢我餓死左，佢都未死啦哈哈 (慘笑)


1月7日

雞脾病情update 07Jan
好精神，血紅素有回升，這是好消息，但仲·未·出·得·院！正衰仔，就來貴過住養和。Probably聽朝可以返歸，聽候獸醫發落。

1月8日

出院啦出院啦出院啦
Medication好似水蛇春咁長 water snake spring long wowow
未好番但已無生命危險，要食成個禮拜藥，三星期後覆診。

1月23日

雞脾又要飛的出去睇急症了。

他從醫院返屋企後，食完藥已經全無病徵，基本上已算康復，仲可以同我出街玩。但狗瘟是長期戰鬥，前兩日開始出現康復後遺症，因狗瘟可能傷到神經，部分狗狗會出現不可治癒的抽筋症狀。一開始抽得不算厲害，醫生說不想給他長期食藥，再觀察幾天好了。但今晚抽得非常嚴重，不停在我懷內抽搐哀號。實在不忍心要他捱到天光，惟有又夜探西營盤。

另外，又想update一下雞脾其他兄弟的情況。雞脾其實一胎4隻，其餘3隻已相繼因狗瘟去世。唉，我考慮要幫雞脾改名做阿糭，因為佢係「死剩種」嘛，哈……（慘笑ing）

1月24日

雞脾未出得院。

 剛去探他，吃了抽筋藥，仍在不停抽筋，還比昨天抽得更厲害，我呆了。看他想睡睡不到，無止境的抽筋，開始有點「原來我處理不到」的感覺，已經不是鬥志和毅力的問題。如果餘生都要這樣下去，我問他o唔ok？他沒答我。我又問自己，我覺得唔ok，非常唔ok。

醫生還未有時間跟我詳談，但大概知道應該對我沒幫助。我有很不好的預感，雞脾生存的權利在我手上，很重很重，但他又不會說話呀！有決心要給他快樂，蓋過痛苦，但如果每天快樂幾小時，痛苦十幾小時，又該如何衡量呢？

以後不敢再養狗了，我太愚昧，實在沒資格承擔另一個生命。

1月25日

雞脾回家了。
 雖然真的如我所想，醫生對他沒甚麼幫助，今天他的左前腳甚至已開始一拐一拐了，但以後就盡力提高他的生活質素吧！下一步是嘗試針灸，然後希望可以為他找一個能24小時看顧，更理想的家。

雞脾，你要健健康康，鍚住自己呀!加油，往後你都會健康快樂地生活!!

「雞脾」(仔)

一早起來，奶茶爸說有人拾了幾隻狗B，放在寵物診所，叫我同前去看看。
原打算真的看看，並幫忙拍個照放fb找領養，沒想過，奶茶爸決定暫養一隻…
診所有6隻唐狗BB，來自兩個「家庭」，一胎是4兄弟(全是一個月大)，另一胎是2兄妹(幾星期大)。
古有「太子選妃」，今有「奶茶選室(友)」
要暫養也得奶茶「同意」呀，我們帶了奶茶去選狗B，
但奶茶似乎都愛做盛女，喜歡一隻狗，她對其他狗BB都沒大多興趣。
最後，我們選了一隻常常「纏繞」奶茶的狗B。取名「雞脾」(仔)。
他來了我們家已經一星期了…他是12月26日奶茶生日的日子來的。
希望可以幫牠找到好人家……
有興趣給他一個家，歡迎查詢。